نكت مغربية

نكت مغربية : امتحان الرياضيات

واحد خرجوه من الامتحان ديال الرياضيات، علاش؟

 لقاوه كاتب جدول الضرب مورا الكالكيلاتريس



نكت مغربية : الرجل ومراتو



واحد الرجل سوّل مرتو: شحال من عام باش تزوّجنا؟ جاوباتو: 25 عام ڭال ليها: كون قتلتك كون دابا خرجت من الحبس

نكت مغربية : الشيباني

واحد الشيباني قال لصاحبو: في أيامات الشباب، كانوا العيالات يجريو يتبعوني

قال ليه صاحبو: ودابا؟

قال ليه الشيباني: لا دابا صافي، عفى عليا الله من الشفرة ديال السيكان

نكت مغربية : الشفار

واحد الراجل خارج من لوزين، وهو يتعرض ليه واحد الشفار هلكو مزيان وخدا ليه الخلصة ديالو

 من بعد 15 يوم، كان الراجل خارج عاوتاني من لوزين، وهو يتعرض ليه نفس الشفار

 يالله بغى يعطيه قتلة ديال العصا تاني، وهو يقول ليه الراجل: حبس أخويا، هاك الخلصة ديالي، بلا ما تضربني

 شد من عندو الشفار الفلوس، وبقا عليه حتى سلخو

 قال ليه الراجل: الله يا خويا، عطيناك الفلوس وهلكتينا

 قال ليه الشفار: أنا ندي شي حاجة بعرق كتافي

نكت مغربية : الطلاق

واحد المكلخ سولوه: أشنو هو أهم أسباب الطلاق؟

فكر المكلخ شوية وقال ليهم: الجواج

نكت مغربية : ما دايرش التمارين

واحد الولد قال لأمه: مي، محتاجك تمشي معايا غدا للمدرسة

قالت ليه أمه: علاش أولدي؟

قال ليها الولد: قال لينا الاستاد اليوما، اللي ما جاش داير التمارين غدا غادي نضرب مو

نكت مغربية : الشارفة واللوز

هادا واحد الشيفور كان غادي بالكار وجالسة مرا شارفة ف القدام

شوية عطات ليه المرا الشارفة شي لوز، وهو ياكلو

شوية تاني، عطات ليه المرا الشارفة شي لوزات وكلاهم

المرة التالتة، مدات ليه المرا الشارفة اللوز، وهو يقول ليها: بارك الله فيك أ الوالدة، ولكن خلي لراسك شوية د اللوز

قالت ليه المرا الشارفة: لا أوليدي، راني ما عندي سنان، وبركة عليا كنمص السكلاط اللي داير بيهم

نكت مغربية : دجاجة محمرة

هادوا تلاتة ديال الصحاب تفارضو فدجاجة محمرة وشراوها

منين جاو ياكلوها مالقاوش الخبز، ناضو صيفطو واحد منهم يجيب ليهم الخبز

تسناوه ساعة ما جاش

تسناوه ساعتين ما جاش

تسناوه تلت سوايع ما جاش

طلع ليهم الدم، وقالوا صافي عيق، ملي يجي ياكل هو الخبز

وهو نيت يخرج ليهوم من مورا الباب، وقال ليهم: شفتوا كون مشيت؟

نكت مغربية : واحد معصب

هادا واحد معصب ما كيحملش يعاود الهدرة جوج مرات

مشى عند واحد الحانوت قال ليه: عندك الحليب؟

قال ليه مول الحانوت: لا

مشى المعصب عند حانوت اخر وقال ليه: و نتا؟

نكت مغربية : لحتي الساروت

واحد سكران مشى لدارو

لاحت ليه مرتو الساروت، وتلف على الثقبة ديال الباب

غوت عليها قال ليها: لحتي الساروت إيوا لوحي التقبة

نكت مغربية : كوري؟

واحد التلميد دخل القسم معطل بلا ما يدق الباب

قال ليه الاستاد معصب: كوري؟؟

جاوبو التلميد: لا لا، مغربي

نكت مغربية : باغي الصداع

واحد دخل لدارو باغي غير يجبد الصداع مع مرتو

ما لقى منين يشدها، شاف حتى عيا وهو يقول ليها: فين الغبرة اللي كانت فوق الطبلة؟

قالت ليه: علاش اشنو بغيتيها؟

قال ليها: كنت كاتب عليها النمرة ديال صاحبي

نكت مغربية : الغليض والريجيم

واحد الغليض مشى عند الطبيب وقال ليه: بغيت ندير ريجيم، تقهرت بهاد الغلض

قال ليه الطبيب: كول نص خبزة ف الفطور، ونص خبزة ف الغدا، ونص خبزة ف العشا

قال ليه الغليض: واش قبل الماكلة أولا بعد منها؟

نكت مغربية : دخل أحمد، خرج أحمد

هادي واحد المرا كبيرة وحشومية بزاف مشات تقرا ف محو الأمية

 وكان العنوان ديال الدرس : دخل أحمد، خرج أحمد

ملي تقول المعلمة: دخل أحمد، كدير المرا الزيف على راسها

وملي تقول المعلمة: خرج أحمد، كتحيد المرا الزيف على راسها

ملي مشات للدار، قال ليها راجلها: آشنو قريتو اليوم؟

 قالت ليه: علاه احمد خلانا نقراو؟ ها هو داخل، ها هو خارج

نكت مغربية : الخياط

واحد السيدة حطات ثوب عند الخياط باش يصوب ليها جلابة

ملي جات تاخذها، قيساتها قدامو وجاتها قصيرة

 الخياط عرف راسو قفرها، قال ليها: طواليتي يا العفريتة

نكت مغربية : البي ام BMW

واحد المكلخ سول صاحبو : بغيت نبيع الطوموبيل ديالي 205 بشي ثمن غالي، أش ندير؟؟

قال ليه صاحبو : مسح ديك 205 و كتب مرسيدس و لا بي ام

دازت مدة، سوله صاحبو : إيوا، بعتي الطوموبيل ؟؟

قال ليه المكلخ : واش تسطيتي؟ كاين شي واحد كيبيع البي ام ؟؟!!

نكت مغربية : الكداب

هادا واحد الكداب كيعاود لصاحبو : مشيت أنا و مراتي لافريقيا، وڭلسنا فواحد لوطيل حدا الغابة

 فالصباح، ڭلت لمراتي لبسي نهبطو نتساراو، لبسات مراتي حوايجها ف خمسة الدقايق وهبطنا

 شوية خرج ليا سبع وانا نضربو بكروشية مات، زدنا وانا نلقا خمسة د السبوعة آخرين

 بديت نضرب، ها اللول، ها التاني، ها التالت، وهوما يجيو ڭاع الحيوانات

 وانا نطلع فوق الشجرة و بديت كنشير عليهم حتى قتلتهم كاملين

ورجعنا للوطيل، وانا نلقى سبع آخر

...

هنا بدا صاحبوا كيموت بالضحك

سولو الكداب: مالك أصاحبي كضحك؟

ڭال ليه صاحبو: ماحشمتيش تكذب؟ مراتك لبسات ف خمسة الدقايق؟

نكت مغربية عملية ناقص

هادا واحد الاستاد كيعلم لواحد التلميد عملية ناقص، قال ليه: جوج ناقص جوج شحال تيبقى ؟

التلميد : معرفتش

الاستاد جبد ليه جوج كرواصات، وقال ليه : شحال هادو؟

التلميد :جوج كرواصات

الاستاد :هاك كول هادي، زيدك هادي، شنو بقى دابا ؟

التلميد: شي بـرّاد ديال اتاي بعقلو

نكت مغربية : علي وبراهيم

علي وبراهيم تشاركوا ف حانوت

واحد النهار، ناض علي علق على الحانوت پلاكة مكتوب عليها بالفرنسية

Alimentation générale

جاء براهيم قرا الپلاكة وكعا، وهو يبدلها ودار فيها

Brahimentation générale

نكت مغربية : الحفرة

هادو رباعة ديال المكلخين عندهم حفرة فالحومة، ناضوا تجمعو باش يلقاو شي حل

قال ليهم واحد: نديروا شي فرملي ف الحفرة، باش اللي طاح فيها يداويه ف البلاصة

قال ليهم واحد اخر: لا نجيبو لابيلانص حدا الحفرة، باش اللي طاح نديوه فيساع للسبيطار

هدر واحد اخر: نريبوا داك السبيطار، ونبنيو واحد اخر

ناض واحد قال ليهم: وا لا! خاصنا نسدو هاديك الحفرة...

ونحفروا وحدة أخرى قدام السبيطار

نكت مغربية : الطاليان

واحد السيد ديما كتعايرو مرتو: الناس ݣ‬اع مشاو للطاليان، ونتا باقي هنا

هو يقول ليها: شوفي، أنا غادي نجلس فالدار واحد الشهر، واللي يسولك علي، ق‬ولي ليه مشى للطاليان

قالت ليه واخا

اللي يسولها كتق‬ول ليه راجلي مشا للطاليان

واحد النهار، سمع ولدو ضربو شي واحد ف الزنقة

هو يطل من الشرجم، وقال ليه: واخا عليك حتى نرجع من الطاليان ونوريك

نكت مغربية : أتاي أولا العشا

واحد المعلم عرض على صحابو يجيو عندو للدار

 ملي جلسو شوية هدروا، قال ليهم: شنو نسبقو أتاي ولا العشا؟

قالوا ليه: العشا !

 هو يقول ليهم: توكلنا على الله نوضو تصليو

نكت مغربية : دودات ف الحمام

هادو جوج دودات مشاو للحمام، وخرج ليهوم لوسخ بزاف

واحد الدودة قالت لصاحبتها: ناري ياختي، كون بقينا شويا كون دودنا

نكت مغربية : كسيدة

واحـد السيد نسيبــتو دارت كسيدة ضرباتــها طومـوبــيل

سولــوه : هــي دارت كسيدة وانت مال شـــلاقـــمك كـــحلين ؟

قــــال ليهم : شبـــعت بوســـان في الروايـــض

نكت مغربية : ضربني ونضربك

واحد مغربي قال لواحد الشينوي: ضربني و نضربك

قال ليه الشينوي واخا

جا الشينوي ضربو، وهو يسخف المغربي يومين

فاش فاق، سول الشينوي قال ليه: أشنو هاديك الضربة ضربتيني؟

قال ليه الشينوي: سميتها

Frappe coup

جات نوبة المغربي، ضرب الشينوي وهو يبقى ف كوما عام

ملي فاق، سول المغربي، قال ليه: أشنو هاديك الضربة ضربتيني؟

قال ليه المغربي: سميتها

K.M.J

قال ليه الشينوي: واشنو هي؟

 جاوبو المغربي: كلامونيت ملوي في جورنال

نكت مغربية : مدير شركة

المعلم طلب من التلاميد يكتبو إنشاء كل واحد يتخيل راسو مدير شركة.

كلشي بدا كيكتب إلا واحد، ربّع يديه وبدا كيتعنكر

جا عندو المعلم وسولو: علاش مكتكتبش؟

جاوبو التلميذ: كنتسنى السكرتيرة ديالي باش نملي عليها وهي تكتب

نكت مغربية : عرفتيني؟

واحد الموضف بغى يعيط للعساس يجيب ليه أتاي

 وهو يغلط ف النمرة وصدق معيط على المدير ديالو

قال ليه: جيب ليا واحد أتاي للمكتب ديالي وطلق راسك أ الحمار

قال ليه المدير: واش عرفتي مع من كتهدر؟

قال ليه الموضف: لا

قال ليه المدير: أنا هو المدير أ الحيوان

قال ليه الموضف: ونتا عرفتي مع من كتهدر؟

قال ليه المدير: لا

قال ليه الموضف: إيوا الحمد لله

وهو يقطع

نكت مغربية :  200 درهم جديدة

هادا واحد مكلخ كان غادي وهي تبان ليه 200 درهم جديييييدة طايحة فالأرض

شاف حتى ما بان ليه حتى واحد

وهو يهز ال 200 درهم جديدة وحط بلاصتها 200 درهم قديمة و مشى هرب يجري

نكت مغربية :Dire

واحد الاستاذ قال لواحد التلميذ: صرف

Verbe "Dire" au présent de l'indicatif

الولد ماعرفش الجواب وبقى ساكت

قال ليه الاستاذ: أنا نعاونك في الاولى، و انت كمل

Je dis

الدري تفتحو عينيه من الفرحة و بدا

Vendredi

Samedi

Dimanche

نكت مغربية : النملات

هادو ربعة د النملات كانوا غاديين ف الغابة، شوية وهو يبان ليهوم فيل

قالت ليهوم النملة اللولة: خاصنا نقتلوه، راه كيهددنا ف هاد الغابة

قالت النملة التانية: لا خاصنا نقطعو ليه رجليه الكبار

قالت النملة التالتة: أش بان ليكوم نلوحوه برا الغابة؟

قالت ليهوم النملة الرابعة: لا حشومة عليكوم، خليوه مسكين، حنا ربعة وهو غير واحد

نكت مغربية : كيري

الولد: بابا بغيت ناخد كيري

الأب: والله ماتاخد غير بنت عمك طامو

الولد: بابا راه كيري فرماج

الأب: حتى طامو راها زبدة

 أش كتعرفو فالزين

نكت مغربية : لقى 4000 ريال

واحد المكلخ كان غادي ولقى 4000 ريال وهو يبدا كيفكر

غادي نعطي 1000 للوالد كايتسالها ليا

و1000 للوالدة كاتسالها ليا

و 2000 اللي كايسالني مول الحانوت

وهو يقول اش غادي يبقى ليا !!!

و الله لا هزيتها

نكت مغربية : حزام السلامة

قررت شرطة المرور تكافئ كل واحد داير حزام السلامة

 لقاو واحد مبوق سايق طوموبيلتو وداير الحزام، وعطاوه 2000 درهم

 وسولوه: أشنو غادي تدير بهاد الفلوس؟؟

قال ليهم: نزيد عليهم ونمشي ندوز بيهم لبيرمي

نكت مغربية : ماطيشة حمرة

هادا واحد الراجل دا ولدو للسوق باش يعلم ليه الألوان

ورا ليه ماطيشة وقال ليه: شوف أولدي، هادي ماطيشة وراها حمرة

واخا كتبان ليك صفرة، راه غير باقا خضرة

نكت مغربية : الرباط سلا

هادا واحد ماعمرو ما مشى للرباط...

نهار مشى ليها، لقا ف الدخلة ديالها بلاكة مكتوب عليها " الرباط سلا"...

هو يقول لصاحبو: هاد الرباط ما لقي ايمتا يسالي حتا جينا ليه حنا

نكت مغربية : ناموسة طارت

هادي واحد الناموسة أول يوم تطير

ملي رجعات للدار، سولاها باها: أشنو كان الشعور ديالك؟

قالت ليه: والله إيلا شعور زوين، كلشي الناس كانت كتصفق ليا

نكت مغربية : المضاربة

واحد سول صاحبو: باش سالات المضاربة ديالك البارح مع مراتك؟

 جاوبو: جات عندي راكعة على ركابيها

 وقالت ليا: خرج من تحت الناموسية أ الخواف

نكت مغربية : أيامات الشباب

واحد الشيباني قال لصاحبو: في أيامات الشباب، كانوا العيالات يجريو يتبعوني

قال ليه صاحبو: ودابا؟

قال ليه الشيباني: لا دابا صافي، عفى عليا الله من الشفرة ديال السيكان

نكت مغربية : لحق على التران

هادا واحد كيجري مورا التران، يطيح وينوض، يطيح وينوض

الناس كاملين اللي راكبين ف التران كيموتوا عليه بالضحك

ناض واحد طل عليه من الشرجم وقال ليه: وبركة أصاحبي، راه قتلتينا بالضحك

قال ليه هاداك الراجل: إيوا دابا تموتوا بالخلعة راه أنا الشيفور

نكت مغربية : عشرين بالمية

هادا واحد الولد جالس ف بلاكة الطوبيس كيكمي وحداه مرا شارفة

المرا عيات مسكينة من الدخان وقالت ليه: شوف أولدي، واش ف راسك نتا اللي كتكمي كتدي عشرين بالمية من النيكوتين وأنا اللي كنشم الدخان كندي تمانين بالمية؟

الولد بقى يشوف فيها، شوية وهو يمد ليها ڭارو وقال ليها: الحاجة، خودي نتي عشرين بالمية وعطيني أنا تمانين بالمية

نكت مغربية : الحمار والكلب

هادا واحد الراجل كان غادي ف الصحرا، راكب حمار ومعاه كلب

وهوما ف الطريق، هدر الحمار وقال للراجل: واش مازال الطريق بعيدة؟

الراجل تصدم وشداتو الخلعة، أو! حمار كيهدر؟ هي مسكون!

ناض الراجل يجري يجري يجري يجري وتابعو كلبو

ملي عيى وهو يوقف.

وتما قال ليه الكلب: وايني خلعة خلعنا هاداك الحمار

اللغات

هذا وحد المش مبوق تابع واحد الفار، وهو يهرب ليه وطلع مع القادوس.

 تخبى المش ساعة ساعتين ما نزلش ليه الفار.

 شوية هو يفكر مزيان وقال: هاو هاو هاو هاو.

 الفار قال مع راسو: ما دام الكلب جا إذا المش هرب.

وملي نزل الفار لقى المش كيتسناه وكلاه.

 وهو يقول المش مع راسو: الواحد في هاد البلاد إيلا ما كان عندو جوج لغات ما ياكلش طرف الخبز

نكت مغربية : النسيبة

هادا واحد جات عندو نســـيـبتو. قال ليها: شحال غتبقاي معانا؟

 قالت ليه: حتى تملو مني

قال ليها: وبقاي غير حتى تشربي أتاي بعدا



نكت مغربية : المجاعة

هادا واحد غليييييييض بزاف تلاقا مع واحد رقيييييييق بزاف

قال ليه: يا خويا اللي شافك يقول عايش ف بلاد فيها مجاعة

قال ليه الرقيق: واللي شافك يعرف شكون دار هاد المجاعة



نكت مغربية : سبرديلة

هادا واحد الولد مستيلي كان راكب ف الطوبيس ولابس سبرديلة ديال ربعين ألف ريال

جات واحد المرا شارفة عفطات عليه

قال ليها: سمحي ليا أ الوالدة، راكي عافطة على ربعين ألف ريال

تحنات المرا مادة إيديها وقالت ليه: ديال أوليدي



نكت مغربية : مول الشفنج

واحد مشى عند مول الشفنج، قال ليه: عطيني كيلو ديال الشفنج.

 كلاه وما شبعش، قال ليه: زيد نص كيلو.

 كلاه وما شبعش، قال ليه: زيد رابعة.

كلاه وهو يشبع، وقال تفوووووووو من اللول كنت ناخد رابعة.